Копилов UFC 302 турнирида енгилмас жангчига қарши октагонга чиқади

Ташкилотчилар томонидан ушбу оқшомнинг яна бир жанги эълон қилинди. Унга кўра, россиялик ўрта вазн тоифаси вакили Роман Копилов бразилиялик мағлубият нималигини билмай келаётган Сезар Алмейдага қарши октагонга кўтарилади.

Роман шу йилнинг февраль ойида ўзининг 4 та ғалабали сериясига чек қўйганди. Ўшанда Энтони Эрнандес иккинчи раундда Копиловни бўғиб қўйганди. Унгача 32 ёшли Роман Алессио Ди Кирико, Пунахили Сориано, Клаудио Рибейро ва Жош Фремдни нокаут эвазига мағлуб этган эди.

Бразилиялик 36 ёшли Сезар Алмейда эса UFC промоушенига Dana White's Contender Series саралаш турнири орқали келган. У якшанба тонгида ташкилотдаги дебют жангини ўтказиб, иккинчи раундда Дилан Будкани техник нокаутга учратганди. Унга қадар ММАдаги қолган жангларида ҳам зафар қучган.