Кремль кубоги. Сабина саралашда мураккаб ўйин ўтказди

Соврин жамғармаси 932 866 АҚШ долларини ташкил этувчи Кремль кубогида икки ҳамюртимиз - Сабина Шарипова ҳамда Нигина Абдураимова ҳам иштирок этяпти. 

Қуръа натижасига кўра, мамлакатимизнинг биринчи ракеткаси бўлиб турган Шарипова саралашнинг илк даврасида исроиллик 23 ёшли Дениз Хазанюкка қарши кортга чиқди. Икки соату 36 дақиқа давом этган учрашувда Сабина рақибасини 6/7(12), 6/4, 3/0 ҳисобида мағлуб этди. 

Гап шундаки, учрашув вакиламиз фойдасига ҳал бўлиб турган бир пайтда исроиллик теннисчи баҳсни давом эттира олмаслигини билдирди ва Шарипова кейинги даврага йўл олди. 

Ҳамюртимизнинг иккинчи босқичдаги рақибаси россиялик 28 ёшли Виталия Дьятченко бўлади. Бу учрашув бугун Тошкент вақти билан соат 13:00да бошланади. Сабина WTA рейтингида 135, Дениз 210, Виталия эса 117-ўринни эгаллаб турибди.