Кун тарихи. Бир йил аввал Ўзбекистон ва жаҳон дзюдоси раҳбарларининг учрашуви бўлиб ўтганди

Токио Олимпиадасининг муҳим рейтинг очколари ўйналган ушбу нуфузли мусобақада Ўзбекистон терма жамоаси ҳам муносиб тарзда иштирок этганди. Дзюдочиларимиз якунда 1 та олтин, 2 та кумуш, 2 та бронза медалини қўлга киритган ҳолда Осиё ва Океаниянинг 40 иштирокчи давлати орасида 6-ўринни банд этишган эди.

Бундан ташқари, Ўзбекистон дзюдо федерацияси раҳбарияти Осиё чемпионати доирасида бир қатор расмий учрашувлар ҳам ўтказганди. Хусусан, федерация президенти Азизжон Камилов Дубай шаҳрида БАА дзюдо, спорт курашлари ҳамда кикбоксинг федерациялари президенти Муҳаммад Бин Талуб Ал Дерия билан учрашган эди. 

Осиё чемпионати доирасидаги яна бир эътиборга молик учрашув Фужайра шаҳрида Халқаро дзюдо федерацияси президенти Мариус Визер билан бўлиб ўтганди. Ўзаро суҳбат чоғида жаноб Визер мамлакатимиз дзюдочиларининг халқаро аренада эришаётган муваффақиятлари, Ўзбекистон мезбонлик қилаётган нуфузли халқаро мусобақаларнинг юқори савияда ташкил этилаётгани ва бу билан юртимиз бутунжаҳон дзюдо ривожига муносиб хисса қўшиб келаётганини алоҳида эътироф этганди.

Учрашув сўнггида келажакда ҳам Ўзбекистон ва Халқаро дзюдо федерацияси ўртасида кенг кўламдаги ҳамкорлик давом эттирилиши таъкидланганди. Мариус Визер ўз сўзида Ўзбекистон бемалол қитъа ва жаҳон чемпионатларини ўтказа олишини урғулаганди. Амалда бу сўзлар ўз исботини топишга яқин турибди. Тошкент шаҳри жаҳон чемпионатига мезбонлик қилади.