Кураш бўйича XV Жаҳон чемпионати санаси қайта кўриб чиқилади. Мезбонлик учун икки даъвогар бор!

Видеоконференц-алоқа шаклида ташкил этилган мазкур йиғилишга IKA Президенти Ҳайдар Фарман раислик қилди. Унда Эрон Ислом Республикасида юзага келган мавжуд сиёсий нотинч вазият инобатга олиниб, мусобақа иштирокчиларининг хавфсизлигини таъминлаш масаласи устувор йўналиш сифатида муҳокама қилинди. 

Шу муносабат билан Жаҳон чемпионатини белгиланган муддатдан кейинга қолдириш ёки бошқа мезбон давлатга кўчириш вариантлари Бошқарув қўмитаси аъзолари томонидан атрофлича кўриб чиқилди. Айни пайтга келиб, 35 дан ортиқ давлатдан 300 нафарга яқин спортчи ва расмийлар “IKA Registration System” орқали XV Жаҳон чемпионатида иштирок этиш учун расман рўйхатдан ўтган.

Юзага келган вазият, шунингдек, Эрон Кураш федерациясининг чемпионатни юқори савияда ташкил этиш борасидаги катта тажрибаси ва тайёргарлиги инобатга олиниб, Бошқарув қўмитаси томонидан яна 10 кунлик кузатув муддати белгилашга қарор қилинди. Агар мазкур муддат ичида мамлакатдаги сиёсий вазият барқарорлашмаса, Кураш бўйича XV Жаҳон чемпионати март-апрель ойларида бошқа давлатда ўтказилади.

Маълум қилинишича, ҳозирги кунда Халқаро Кураш ассоциациясига XV Жаҳон чемпионатига мезбонлик қилиш истаги билан Ўзбекистон ва Миср Кураш федерацияларидан расмий таклифлар келиб тушган.

Белгиланган 10 кунлик муддат якунларига кўра, Жаҳон чемпионатининг аниқ санаси ва мезбон давлати бўйича якуний қарор қабул қилиниб, жамоатчиликка эълон қилинади.