Кураш федерациясининг Тошкент вилояти бўлинмасига янги раҳбар сайланди

Унда миллий спортимизнинг вилоятдаги ривожи, Ўзбекистон Республикаси Президентининг 2017 йил 2 октябрдаги “Кураш” миллий спорт турини янада ривожлантириш чора-тадбирлари тўғрисида”ги қарорининг ижроси юзасидан амалга оширилган ишлар таҳлил қилинди. Мутасаддилар якунланиб бораётган спорт мавсуми бўйича ҳисобот беришди.

Тошкент вилояти ўзининг номдор полвонлари, юқори спорт салоҳияти билан бошқалардан ажралиб туради. Йиғилишда айни жиҳатга алоҳида эътибор қаратилган ҳолда тобора дунё спортига айланиб, халқаро майдонларда юртимизнинг фахри ва ғурури сифатида гавдаланаётган Кураш бўйича мусобақаларда Тошкент вилояти спортчиларининг иштирокини таъминлаш, вилоятда кураш миллий спорт турининг оммавийлигини ошириш ва ёшларнинг ушбу спорт тури билан шуғулланишлари учун етарлича шароитлар яратиб бериш устувор вазифалардан эканлиги таъкидланди.

Конференцияда ташкилий масала кўриб чиқилди. Унга кўра, Тошкент вилояти прокурори Салом Исматович Самадов Ўзбекистон кураш федерациясининг Тошкент вилоят бўлинмаси раиси этиб сайланди. Шунингдек, раиснинг спорт масалалари бўйича биринчи ўринбосари лавозимига Тошкент вилояти ИИББ ЙҲХБ бошлиғи Бахтиёр Кабилович Нигманов,  Молия-иқтисод масалалари бўйича ўринбосар лавозимига “АгротехинвестТрайд” МЧЖ бош менежери Қаҳрамон Усмонович Усмонов ва Ташкилий ва ижро масалалари бўйича ўринбосар лавозимига Тошкент вилояти прокурорининг катта ёрдамчиси – Акбаров Шарифжон Исмановичлар сайландилар.

Йиғилишда замонавий кураш қоидалари муаллифи, Кураш Халқаро Ассоциацияси асосчиси, Ўзбекистон кураш федерацияси раисининг биринчи ўринбосари Комил Юсупов иштирок этди. Конференция якунида амалга оширилиши лозим бўлган ишлар юзасидан тегишли қарорлар қабул қилинди.

Ўзбекистон кураш федерацияси матбуот хизмати