Kurash–World Series Pro Дунё мўъжизали юртида давом этади

Бу тоғларнинг қораси жуда узоқдан, бир неча ўн километр узоқликдаги Қоҳира шаҳридан ҳам кўриниб туради. Ғаройиб кўриниш, геометрик аниқлик, тарихий жозибадорлик, қудратли улуғворлик буларнинг барчаси Миср эҳромларида мужассам. 

Миср эҳромлари Дунё мўъжизалари рўйхатига ҳам киритилган.

7-13 июль кунлар Мўъжизалар юртида илк бора катта кураш байрами ташкил этилади. Кураш бўйича катталар ва ёшлар ўртасида Африка чемпионати ҳамда Kurash–World Series Pro турнирининг Африка қитъаси саралаш босқичларига Миср пойтахти Қоҳира шаҳри мезбонлик қилади.

Халқаро Кураш ассоциацияси, Африка Кураш иттифоқи, Миср Кураш қўмитаси, Миср Миллий Олимпия қўмитаси ва Ўзбекистон ҳукумати ҳамкорлигида ташкил этилаётган мазкур мусобақаларда қитъанинг энг кучли полвонлари куч синашади.

Кураш баҳслари Қохиранинг энг йирик ва замонавий “Complex Heliopolis” ёпиқ спорт мажмуасида ташкил этилиши режалаштирилган. Мазкур комплекс 1991 йилда қуриб фойдаланишга топширилган бўлиб, 4 та ёпиқ мажмуадан ташкил топган. 16 минг томошабинни ўз бағрига сиғдира оладиган комплекснинг футбол залида FIFA доирасида кўплаб халқаро учрашувлар ўтказилган.

Мусобақа дастурига асосан 7 июль куни Африка Кураш иттифоқининг Бошқарув йиғилиши ўтказилади. 8 июль куни ҳакамлар ва мураббийлар семинари ва имтиҳонлари бошланади. 9-11 июль кунлари катталар ва ёшлар ўртаси Африка чемпионати бўлиб ўтади.

12 июль куни эса Ўзбекистон Республикаси Президенти соврини учун World Series Pro турнирининг Африка қитъаси саралаш босқичи ўз ғолибларини аниқлайди.

Маълумот учун, Миср Кураш қўмитаси 2022 йилда ташкил этилган ва шу йилнинг ўзида Пуна шаҳрида бўлиб ўтган IKAнинг навбатдаги Конгрессида аъзоликка қабул қилинган. Кураш бўйича йирик халқаро тадбирларда Мисрда илк маротаба ташкил этилмоқда.