Кутилмаган натижа. АҚШ хоккейчилари учун Олимпиада якунланди

Ғолиблик учун асосий даъвогарлардан бири ҳисобланган АҚШ терма жамоаси чорак финалда Словакияга ўйиндан кейинги буллитлар сериясида имкониятни бой бериб, Олимпиададаги иштирокини якунлади.  

Ушбу 1/4 финалдан ўрин олган илк учрашув "Миллий" стадионда ўтказилиб, словакияликлар баҳс якунига 34 сония қолган бир пайтда ҳисобни тенглаштиришди. Қўшимча 5 дақиқаликда ҳисоб ўзгармади. Буллитлар сериясида эса омад европаликларга кулиб боқди. "Татра рицарлари"га ғалабани Петер Цегларик келтирди.

Шу тариқа, Словакия терма жамоаси Олимпиаданинг илк ярим финалчисига айланди. Айни дақиқаларда Россия - Дания учрашуви бўлиб ўтмоқда. Шунингдек, 1/4 финалда Финляндия - Швейцария, Швеция - Канада жуфтликлари ҳам ўзаро тўқнаш келишади. Ярим финаллар 18 февраль кунига белгиланган.