Кутилмаган хабар. Флойд Мейвезер ММА жангидан воз кечди

Мейвезер шу йилнинг 31 декабрь куни Саитама шаҳрида япониялик кикбоксчи Теншин Насукавага қарши жанг ўтказиши керак эди. 

“Биринчидан, мен, Флойд Мейвезер ҳеч қачон Теншин Насукава билан ўтказиладиган жанг расман эълон қилмаганман. Шунчаки мендан уч раунддан иборат жами 9 дақиқалик кўргазмали жангда иштирок этиб беришимни сўрашганди. 

Бу таклифни Rizin Fightning Federation компанияси берган эди. One Entertainment компанияси вакили Брент Жонсон ҳам бу кўргазмали жанг катта гонорар эвазига кам сонли бадавлат инсонлар учун ўтказилишини айтганди. Кейин жанг шунчаки шоу характерида бўлиб, бутун дунёга трансляция қилинмаслиги ҳам таъкидланган эди. 

Афсуски, биз матбуот анжуманида хайратдан ёқа ушладик. Унда ташкилотчилар жанг ростмана аралаш қоидалар асосида ўтказилиши ва бутун дунёга трансляция қилинишини маълум қилишди. Мен жанжал кўтариб ўтирмадим ва оддийгина қилиб бу жанг ўтказилмайди дедим. Мухлислардан бу ҳолат учун узр сўрайман. Кечиримнинг каттасини ташкилотчилар сўрашлари керак”, - деди Мейвезер.