Кутилмаган хабар! Яндан сўнг Ислам Махачев ҳам рақибсиз қолди

Енгил вазн тоифаси UFC рейтингида 5-ўринни эгаллаб турган Ислам Махачевнинг рақиби бразилиялик Рафаэль Дос Аньос машғулотда орттириб олган жароҳати сабаб бўлажак жангда иштирок эта олмайди. Бу ҳақида Махачев ўзининг Твиттер саҳифасида хабар берди. 

"Ўзингга қўшиб менга ҳам рақиб топ", - дея Петр Ян қўйган хабар остида фикр қолдирган Махачев. 

Аввалроқ собиқ чемпион Петр Яннинг рақиби, енгил вазн тоифаси чемпиони Алжамэйн Стерлинг ҳам UFC 267 турнирида октагонга чиқмаслигини маълум қилганди. 

"Аньос яна жароҳат олганига шахсан мен ишонмайман", - дея фикрини давлм эттирган Ислам. 

Исламнинг гапига жавобан собиқ UFC чемпиони ҳам ўз сўзларини хабар остида изоҳ сифатида қолдирган.   

"Сен чиндан ҳам мени ёлғончиликда айблаяпсанми? Даҳшатли жароҳатдан эндигина фориғ бўлиб, жангга қайтишга тайёр тургандим. Сендан фарқли равишда менинг оилам бор. Уларнинг келажагига мен масъулман", - дея жавоб берган Дос Аньос.

Ҳозирча UFC расмийлари Петр Ян ва Ислам Махачевнинг бекор бўлган жанглари ҳақида ҳеч қандай изоҳ беришмаган. UFC 267 турнири 30 октябрь куни Абу-Даби шаҳрида ўтказилиши керак. Ян катта эҳтимол билан ушбу оқшомда Кори Сэндхагенга қарши вақтинчалик чемпион камари учун окгагонга чиқиши мумкин.