Ламин Ямаль диний камситишларга қарши: "Мен мусулмонман, алҳамдулиллаҳ!"

Барселонадаги "RCDE Стэдиум"да ўтган баҳсда айрим мухлислар мусулмонларни ҳақорат қилувчи ҳайқириқларни ишлатишган.

Ўйиннинг 20-дақиқаси атрофида стадиондаги мухлисларнинг бир қисми "Ким сакрамаса, ўша мусулмон" қабилидаги ноўрин ҳайқириқларни сўзлашган. Ламин Ямаль ушбу ҳолатни кескин қоралади.

"Мен мусулмонман, алҳамдулиллаҳ! Кеча стадионда "Ким сакрамаса, ўша мусулмон" деган ҳайқириқлар янгради. Бу сўзлар рақиб жамоага қаратилганини ва менга нисбатан шахсий адовати йўқлигини билсам-да, мусулмон сифатида буни ҳурматсизлик ва қабул қилиб бўлмас ҳолат деб ҳисоблайман.

Диндан стадионда ҳазил сифатида фойдаланиш сизни жоҳил ва ирқчи қилиб кўрсатади. Футболда одамларни кимлиги ёки нимага ишониши учун ҳақорат қилмасдан, ўйиндан завқ олиш ва жамоани қўллаб-қувватлаш керак. Шунга қарамай, бизни қўллаб-қувватлаш учун келганларга раҳмат, Жаҳон чемпионатида кўришгунча", — деб ёзади ёш иқтидор соҳиби.

Эслатиб ўтамиз, Ламин Ямаль Испания терма жамоаси билан биргаликда ЖЧ-2026 финал босқичида иштирок этади. Унинг ушбу баёноти ижтимоий тармоқларда кенг муҳокамаларга сабаб бўлмоқда.