06 янв 18:14
Янгиликлар

Бокс/ММА

Леснар чорак миллион доллар жарима тўлаши шарт

Оғир вазн тоифасида собиқ UFC чемпиони Брок Леснар Невада штати ғазнасига икки ярим йил олдин белгиланган жарима пулини тўламади.

Невада штати Спорт қўмитаси 2016 йилнинг июль ойида допинг-тест назоратидан ўта олмаган Леснарни 250 000 доллар миқдоридаги жаримага тортган эди.

Орадан икки ярим йил ўтган бўлса-да, Леснар ушбу жарима пулини тўлагани йўқ. UFCга қайтиш истагини билдирган Брок ўтган йили USADA дастури доирасида бир неча бор допинг текширувдан ҳам ўтди. Лекин мавжуд қоидаларга кўра Леснар жарима пулини тўламагунича жанг ўтказа олмайди.

Эслатиб ўтамиз, аввалроқ UFC президенти Дана Уайт Брок Леснар ҳамда оғир вазн тоифасида амалдаги жаҳон чемпиони Даниэль Кормье ўртасида жанг ташкил этишга ҳаракатлар бошланганини маълум қилган эди.