Литва спорт мутахассисларидан иборат делегация пойтахтимизга ташриф буюрди

Дастлаб меҳмонлар марказ тарихидан сўзловчи музейни кўздан кечирди. Шундан сўнг томонлар ўзаро мулоқот қилиш, манфаатли ҳамкорлик борасида суҳбатлашиш мақсадида стол атрофида жам бўлдилар. Литвалик экспертларга ушбу таълим даргоҳи, унинг ўзбек спортидаги ўрни, тарбияланувчиларнинг натижалари ҳақида маълумот берилди.  

Меҳмонлар ўз йўналишидан келиб чиқиб, фаолияти, мақсадлари ҳақида айтиб ўтишди. Танишув ва суҳбатдан кейин марказ директори делегация аъзоларига эсдалик совғаларини топширди.

Шундан сўнг даргоҳнинг моддий-техник базаси, машғулот майдончалари ҳамда спорт залларига борилди. Дастлаб от спорти бўлими кўздан кечирилди.  

Делегация аъзолари от устида сайр қилиш имконига ҳам эга бўлишди. Кейинги объект камондан отиш зали. Меҳмонларга бу йўналишдаги ютуқларимиз, изланишларимиз борасида маълумот берилди. Камондан отиш залидан тўғри енгил атлетика манежига йўл олинди. Атлетларимизнинг машғулот жараёнлари эътибор марказида бўлди.

Мураббийлар билан суҳбат қурилди. Кейин эса гандбол зали кўрсатилди. Литвалик мутахассислар марказда яратилган имкониятларни алоҳида эътироф этишди. Охирги объект марказдаги сув ҳавзаси бўлди. Мазкур иншоот ҳам делегатларнинг эътирофига сабаб бўлди. 

Учрашувдан сўнг хорижлик меҳмонлар илиқ таасуротда эканини, таклифлар тайёрлаб қайта мурожаат қилишларини таъкидлади. Ўзаро ҳамкорлик ҳар икки томонга манфаатли бўлади.