Ломаченко - Кэмпбелл. "Ой жанги" учун аталган ПРЕВЬЮ

Икки карра Олимпиада чемпиони бошқа бир Олимпия ўйинлари ғолибига қарши жанг қилади. Люк бутун дунёни ҳайратга солиб, чемпионлик камарларига эга чиқишни истамоқда, Лома эса яна бир бор жаҳонинг энг зўри эканлигини исботлаш учун жанг қилади. Бу тўқнашув сўзсиз ёз фаслининг энг қизиқарли жанги бўлади. Люк рақибига нисбатан беш сантиметр узун, шунингдек қўллар узунлиги борасида ҳам Люкнинг имкониятлари баланд. Кўпчиликка Люк Василийдан ёш деб ҳисобланса ҳам, ҳар икки боксчи ҳам тенгдош ҳисобланади. Кэмпбелл ва Ломаченко 31 ёшда. Бу спортчилар ҳақида қисқача маълумот эди. 

Энди боксчиларнинг жанг услуби ҳақида фикр билдирсак. Дастлаб даъвогар Люк Кэмпбелл ҳақида. Люк - ҳаракатланувчи боксчилар қаторига киради. У асосан рақибларига жеб зарбаларини беришни яхши кўради ёки рақибнинг танасига кўп зарба беради. Кэмпбелл рақибларини ҳимояланишга мажбур қилишга ҳаракат қилади ҳамда асосан панчер бўлиб эмас, балки очко зарбаларини беради. Люк асосан жангнинг иккинчи қисмида кучли бокс кўрсатади. 

Ломаченко эса биринчи навбатда жуда ҳам ақлли жанг қилади. У жуда тезкор ҳамда техникаси мукаммал боксчи. Лома сўзсиз тезлик борасида Люкдан устун. Лома ҳам Люк сингари чапақай. Ломаченко жангларда тўлиқ устунлик қилишга интилади ҳамда жангларни иложи борича тезроқ якунлашга ҳаракат қилади. Кўпчилик экспертларнинг фикрича, Ломаченко рақибини қийинчиликсиз мағлуб этади. Тўғри Люк яхши боксчи, лекин Ломаченко энг зўри.

Эслатиб ўтамиз, жанг бугун тунда Тошкент вақти билан соат 01:30 дан сўнг бошланиши режалаштирилмоқда. Тўқнашув "Матч ТВ" телеканали орқали жонли эфирда намойиш этилади. Ундан олдин эса соат 01:00 да Поветкин - Фьюри жангини томоша қилиш мумкин бўлади. 

Ниғмонхўжа Нозимов тайёрлади