Лу Шанглей – блицда Осиё чемпиони, Қосимжонов 10-ўринда

Шанглей 9 имкониятдан 7,5 очко жамғаришга муваффақ бўлди.

Ушбу Осиё чемпионатининг биринчи рақамли шахматчиси бўлган вьетнамлик Ле Куанг Лием 7 очко билан кумуш медални қўлга киритди. Ҳиндистонлик Лалит Бабу ҳам 7 очко жамғарди ва қўшимча кўрсаткичларга кўра бронза медали билан тақдирланди.

Ҳамюртимиз халқаро гроссмейстер Жаҳонгир Воҳидов ҳам совридорлар сафидан жой олиши мумкин эди. Лекин ёш шахматчимиз сўнгги турда оқ доналарда ҳаракат қилганига қарамай, хитойлик гроссмейстер Вен Янгга имкониятни бой бериб қўйди. Якунда 6,5 очко билан қолган Жаҳонгир қўшимча коэфицентларга кўра 8-ўринни банд этди.

Ҳамюртимиз 17-жаҳон чемпиони, Осиё чемпионатининг иккинчи рақамли иштирокчиси Рустам Қосимжонов эса 6,5 очко билан 10-поғонадан жой олди. Маълумот учун, ҳиндистонлик халқаро гроссмейстер Сеттураман классик йўналишда Осиё чемпиони бўлган эди.