Мағлубиятсиз Синдаров Saint Louis Rapid & Blitz 2026 рапид баҳсларини нечанчи ўринда якунлади?

Ушбу нуфузли турнирда ҳамюртимиз Жавоҳир Синдаров ҳам муваффақиятли дона сурмоқда. Мусобақанинг учинчи куни рапид бўйича сўнгги учта тур учрашувлари ўтказилди. Бу сафар ҳам Жавоҳир мағлубиятга учрамади. У ўтказилган учта партияда бир ғалаба ва икки дуранг қайд этди. Еттинчи турда мезбонлар вакили Леньер Домингес, 9-турда асосий таъқибчиси Уэсли Со (АҚШ) билан дуранг ўйнаган Синдаров 8-турда америкалик Эвондер Лиангни мағлубиятга учратди. 

Шу тариқа, Жавоҳир Синдаров рапид баҳслари 11 очко билан иккинчи ўринда якунлади. Ҳиндистонлик Рамешбабу Праггнанандҳа 12 очко билан пешқадамлигини сақлаб қолди. Уэсли Со 10 очко билан кучли учликка якун ясади. Тўрт нафар шахматчи 9 очкодан жамғарди. 

Бугун блиц, яъни тезкор шахмат баҳслари бошланади. Учрашувлар бизнинг вақт билан соат 22:00да бошланади. Илк турда Жавоҳир қора доналарда америкалик Левон Аронян билан ҳисоб-китоб қилади. Блицда вақт назорати 5+2 форматида бўлади. Рапид ва блицда жамғарилган очколар жамланмасига кўра мусобақа ғолиб ва совриндорлари аниқланади. 

Иштирокчиларнинг тўлиқ таркиби: Жавоҳир Синдаров (Ўзбекистон), Фабиано Каруано, Левон Аронян, Уэсли Со, Леньер Домингес, Авондер Лианг (барчаси АҚШ), Винсент Кеймер (Германия), Аниш Гири, Йорден ван Форест (иккиси ҳам Нидерландия), Рамешбабу Праггнанандҳа (Ҳиндистон).