Маҳмуд Мурадов Лондондаги UFC 286 турнирида октагонга чиқишга тайёр

Эртадан кейин, 7 январь куни пойтахтимиздаги "Юнусобод" спорт мажмуасида Маҳмуд Мурадовга тегишли промоушеннинг MPL 7 турнири бўлиб ўтади. Айни пайтда Тошкентда бўлиб турган Мурадов ўзининг UFC`даги жанги бўйича берган саволимизга шундай жавоб берди. 

"18 март куни Лондондаги The O2 аренада UFC 286 турнири бўлиб ўтади. Мен бу турнирда октагонга чиқишга тайёрлигимни айтиб, UFC`га мурожаат қилдим. Ҳозирча бунга жавоб беришмади. Агар ижобий жавоб келса, тайёргарликни Чехиядан бошлайман. Прагадан Лондонга бориш ҳам осон бўлади. Қолаверса, чехиялик мухлисларим ҳам Лорндонда кўпчиликни ташкил этарди", - деди Мурадов. 

Лондондаги оқшомнинг марказий жанги асли келиб чиқиши ямайкалик, ҳозирда Британия шарафини ҳимоя қилаётган Леон Эдвардс иштирокида бўлиб ўтиши кутилмоқда. UFC чемпиони ушбу камарнинг собиқ соҳиби нигериялик Камару Усманга қарши октагонга чиқиши керак эди. Лекин Усман жароҳат олгани сабабли унинг ўрнини Белал Муҳаммад эгаллаши кутилмоқда.