Маҳмудов - Фьюри жанги Лондондаги стадионда бўлиб ўтади

Россиялик боксчи Арсланбек Маҳмудов 11 апрель куни Лондондаги 60 минг томошабинга мўлжалланган "Тоттенхем" клубига тегишли стадионда собиқ жаҳон чемпиони Тайсон Фьюрига қарши жанг ўтказади.

Британиялик 37 ёшли Фьюри январь ойи охирида 36 ёшли Маҳмудовга қарши жангда рингга қайтишини расман эълон қилганди, лекин ўшанда жанг ўтказиладиган арена номи айтилмаган эди.

Маълумот учун, Тайсон Фьюри учун бу арена бегона эмас, у тўрт йил аввал "Тоттенхем" стадионида Дерек Чисорага қарши жанг қилганди. Шунингдек, 2021 йилда ушбу стадионда Энтони Жошуа ва Александр Усик, ўтган йили эса кичик Крис Юбанк ва Конор Бенн ўртасида иккита жанг ҳам бўлиб ўтганди.

talkSPORTS’нинг қайд этишича, Фьюри жамоаси Манчестердаги 74 000 кишилик "Олд Траффорд" стадионида жанг ўтказиш имкониятини ҳам кўриб чиққан. Келаётган душанба куни Лондонда расмий матбуот анжумани бўлиб ўтади ва унда бўлажак жангнинг тафсилотлари эълон қилиниши кутилмоқда.