Манба: ФИФА президенти тез орада Тошкентга келади

Ҳозирча ташрифнинг аниқ санаси ва дастури расман эълон қилинмаган.

Жанни Инфантино Ўзбекистонга охирги марта 2025 йил 8 сентябрда келган эди. У Тошкентда Ўзбекистон ва Эрон терма жамоалари ўртасидаги CAFA Nations Cup финалини стадиондан кузатди. Ташриф доирасида Инфантино Президент Шавкат Мирзиёев билан учрашди ва унга ўзбек футболини халқаро миқёсда ривожлантиришга қўшган ҳиссаси учун "Дўстлик" ордени топширилди. Ўша учрашувда Тошкентда ФИФАнинг минтақавий офисини очиш бўйича келишувга эришилган.

Ўзбекистон 2027 йилда Озарбайжон билан биргаликда футбол бўйича FIFA U-20 жаҳон чемпионатига мезбонлик қилади. Мусобақани ўтказишга тайёргарлик доирасида ташкилий қўмита тузилиши, стадионлар, машғулот майдонлари, транспорт ва бошқа инфратузилмани ФИФА талабларига мослаштириш белгиланган.

Ўзбекистон бунга қадар 2024 йилги футзал бўйича жаҳон чемпионатини қабул қилган. 14 сентябрдан 6 октябргача Тошкент, Андижон ва Бухорода ўтказилган мазкур мусобақа Марказий Осиё тарихидаги илк ФИФА турнири бўлган. Инфантино 2024 йил 6 октябрда "Ҳумо Арена"да ўтган Бразилия—Аргентина финалини ҳам бевосита томоша қилган эди.