Марокаш Гран-Приси. Биринчи кунги баҳслардан сўнг БИРИНЧИмиз!

Марокаш Гран-Присида дунёнинг 5 қитъаси 71 давлатидан жами 487 дзюдочи медаллар ҳамда муҳим рейтинг очколари учун татамига чиқмоқда. Мамлакатимиз шарафини 14 нафар полвонимиз ҳимоя қиляпти. 

Қувонарлиси, мусобақанинг биринчи кунги баҳслари терма жамоамиз учун кутилганидан ҳам омадли келди. Бир йўла икки дзюдочимиз ўз вазн тоифаларида барча рақибларини мағлубиятга учратиб, олтин медални қўлга киритишди. 

-60 кг вазнда Шарофиддин Лутфуллаев, -66 килограмда эса Сардор Нуриллаев Марокаш Гран-Приси ғолибига айланди. Биринчи кунги баҳслардан сўнг Ўзбекистон терма жамоаси умумжамоа ҳисобида 2 та олтин медал ва битта 5-ўрин билан биринчи ўринни эгаллаб турибди. 

Биттадан олтин, кумуш ва бронза медалига эга бўлиб турган Испания терма жамоаси иккинчи поғонадан жой олган. Франция ва Хитой Тайпейи дзюдочилари биринчи кунги баҳсларда биттадан олтин медални қўлга киритишди. Ҳозир жами 14та жамоа ҳисобида камида биттадан бронза медали бор.