Маскатда бўлиб ўтадиган ООК Бош ассамблеясига тайёргарлик муҳокама қилинди

Унда Қўмита Бош котиби О.Касимов, шунингдек, МОҚ раисининг барча ўринбосарлари ва маслаҳатчилари иштирок этишди.

Йиғилиш терма жамоаларимизнинг келаси йил бўлиб ўтадиган Олимпия ўйинларига тайёргарлик ҳолатини муҳокама қилиш билан бошланди. Шунингдек, 2022 йил Ханчжоуда бўлиб ўтадиган Осиё ўйинлари ва Париж-2024 Олимпия ўйинлари учун селекцион мусобақаларни ўтказиш тартиби ва бошқа йўналишлар устида фикр алмашилди.

Шунингдек, кун тартибидан жорий йилнинг 16 декабрь куни Ўмоннинг Маскат шаҳрида бўлиб ўтадиган Осиё Олимпия кенгашининг 39-Бош ассамблеясида қатнашиш учун ҳар томонлама пухта тайёргарлик кўриш, жумладан, унда иштирок этадиган МОҚ, Жисмоний тарбия ва спорт вазирлиги ҳамда Тошкент шаҳар ҳокимлиги мутасаддиларидан иборат делегация таркибини шакллантириш масаласи ҳам атрофлича муҳокама қилинди. Боиси Маскатдаги Бош ассамблея давомида Тошкент шаҳрининг 2025 йилда ёшлар ўртасидаги Осиё ўйинларини қабул қилиши бўйича ООК билан шартнома имзоланиши кутилмоқда.

Учрашув давомида Марказий Осиё мамлакатларидаги ҳамкасблар билан дўстона алоқаларни мустаҳкамлаш, бугунги эпидемиологик даврда ўзаро тажриба алмашиш каби масалаларига ҳам тўхталиб ўтилди.