Матонат мактаби бу - маҳорат мактабидир!

Ёдингизда бўлса юртбошимиз ўтган йили Токио Паралимпия ўйинларида муносиб иштирок этган спортчилар билан учрашув чоғида Миллий паралимпия қўмитаси таркибида “Матонат мактаби”ни ташкил этиш ташаббусини илгари сургандилар. 

Президентимиз ўз сўзларида тақдир синовларига мардона бардош бериб, сабр-тоқат ва шукроналик руҳи билан, ҳаётда муносиб ўрнини топиб, керак бўлса Ватанимиз шаънини улуғлашда жасорат кўрсатаётган параспортчилар ҳақиқий матонат ва қаҳрамонлик намунаси эканлигини таъкидлагандилар.

- Мен Паралимпиячиларнинг матонат мактаби фаолиятини ташкил этиш чора-тадбирлари тўғрисидаги қарорни ўқиб, жуда хурсанд бўлдим, - дейди Ўзбекистон Паралимпия қўмитаси раиси, Осиё Паралимпия қўмитаси вице-президенти Мухторхон Ташходжаев. - Паралимпиячилар учун матонат мактабининг ташкил этилиши дунёнинг ҳеч бир мамлакати паралимпия тарихида қайд этилмаган. Аввалари руҳий тушкунлик, нима қилишини билмай юрган имконияти чекланган инсонлар ҳаёт тарзи қийин кечган бўлса, эндиликда матонат мактаби вакиллари ўз ҳаётий тажрибалари, босиб ўтган йўллари хақида республикамиз бўйлаб барча маҳаллалар, таълим муассасалари ёшларига сўзлаб беришяпти ва шу йўл билан уларни ҳаётда ўз ўринларини топишга ундаяптилар. Бу жуда маъсулиятли ҳамда шарафли вазифа. Руҳи тетик, баланд ифтихор, ғурури бор ёшларни камол топишида кўмак бериш бу паралимпиячиларга билдирилган юрт отасининг ишончидир. Бир сўз билан айтганда, матонат мактаби бу - маҳорат мактабидир.