Махачев - энг яхши UFC жангчиси! Жонсни биринчи ўриндан туширди

Ислам Махачев P4P рейтингида биринчи ўринни эгаллади.

Бу Алекс Волкановскини мағлуб этиб, иккинчи марта енгил вазн тоифасидаги камарни ҳимоя қилганидан кейин содир бўлди. Ҳозир Махачев лиганинг энг яхши жангчиси. Расмий равишда!

Ислам бунга қандай қилиб эришди?

Махачев бир йилдан ортиқ вақт давомида P4P кучли учлигидан тушмади

Ислам Махачев P4P рейтингига илк бор 2022 йил октабрь ойида Чарльз Оливейрани мағлуб этиб, енгил вазн тоифасида чемпион бўлганида кирган эди. Кейин у дарҳол учинчи ўринни эгаллади - фақат Алекс Волкановски ва Исраэль Адесанья ундан олдинда эди. Шундан сўнг Махачев кучли учликдан тушмади.

«Тўғрисини айтсам, UFC менинг қобилият ва маҳоратимни жуда юқори баҳолади. Мен биринчи ўринга кўтарилмагунимча тўхтамайман. Ўйлайманки, кейинги йил ёки кўпи билан бир ярим йил ичида мен биринчи ўринда бўламан» - деган эди Махачев P4P'да пайдо бўлганидан кейин.

2023 йил февраль ойида Махачев Волкановскини мағлуб этди ва илк бор камарни ҳимоя қилди, аммо рейтинг етакчисини енганига қарамай биринчи ўринга кўтарилмади. Бу ММА ҳамжамиятида норозилик ва баҳс-мунозараларга сабаб бўлди. Мисол учун, нуфузли Sherdog портали Махачевни қўллаб-қувватлади.

«Аввало, Австралияга ғалаба учун бордик. Биз камарни ҳимоя қилиб, уйга олиб келдик. Баъзи порталлар мени биринчи ўринга қўйишди, баъзилари эса йўқ. UFC биринчи ўринга қўймасликка қарор қилди. Балки улар реваншни шу тарзда ташкиллаштирмоқчидирлар. Менга фарқи йўқ - камар менда», - деди Махачев февраль ойида.

Кейинчалик у шундай деди: «Бу қарор мамлакатимизга бўлган муносабат туфайлими? Балким. Мен бу ўйинларга қўшилмайман. Мен бориб уларнинг чемпионини мағлуб этдим. Улар буни рейтингга қўшишадими ёки йўқми: бу мени ҳавотирлантирмайди. Асосийси, камар менинг елкамда». 

Март ойида Жон Жонс октагонга қайтди, у Сирил Ганни мағлуб этгандан сўнг дарҳол P4P'да биринчи ўринга кўтарилди - Махачев учинчи ўринга тушиб кетди. Бироқ, ESPN уни ўз рейтингининг етакчиси сифатида қолдирган.

Махачев қишда P4P пешқадамига айланиши мумкин эди. Жонснинг жароҳатидан кейингина ҳаммаси ўзгарди

Махачев ҳозирга келиб P4P етакчисига айланди. 2023 йил октябрь ойида Волкановскини енганидан кейин у иккинчи ўринга кўтарилди. Жон Жонс жароҳат олиб, ноябрь ойига режалаштирилган Стипе Миочичга қарши чемпионлик жангини тарк этганидагина вазият ўзгарди. Жонс узоқ муддатга сафдан чиқди, шунинг учун етакчиликни йўқотиши мантиқан тўғри.

«Менимча, бу UFC'нинг сиёсати. Жон Жонс Америка жамоатчилиги учун катта ном. У қизиқарли жанг ўтказади. Ва ташкилот унинг олдида интригани сақлаб қолишни хоҳлади, P4P'нинг биринчи рақамлиси  барча даврларнинг энг яхши оғир вазнли жангчиси Миочич билан курашмоқда.

Лекин мен UFC рейтингида биринчи ўринга лойиқ эканлигимга ишонаман. Чунки мен ўша пайтдаги P4P'нинг биринчи рақамли жангчиси Алекс Волкановскини мағлуб этгандим. Эҳтимол, сўнгги раунд (биринчи жанг) туфайли мени биринчи ўринга қўйишмагандир.

Аммо мен ҳозир барча саволларга нуқта қўйдим, деб ўйлайман. Мен Жонснинг хизматларини камситмайман. Бироқ унинг сўнгги бешта жанги Миочич ва оғир вазн тоифасининг бошқа яхши йигитларини мағлуб эта олишига у қадар ҳам кўп ишонч уйғотмайди», - деган эди Махачев иккинчи ўринда бўлганида.

Яна қайси россияликлар P4P'га киришди?

Махачев P4P биринчи ўринни эгаллаган иккинчи россиялик бўлди. Биринчиси Хабиб Нурмагомедов - 2020 йил октябрь ойида Жастин Гетжини мағлуб этганидан кейин етакчига айланган эди. Бу 2021 йилнинг мартигача, яъни Хабиб фаолиятини якунлашини эълон қилгунига қадар давом этди.

Яна бир россиялик Петр Ян ҳам P4P'нинг энг яхши 15 талигига кирди. Петр 2020 йил июль ойида Жозе Альдони енгиб чемпионликни қўлга киритгандан кейин рейтингга киритилди. Кейинроқ Ян 13-ўринни эгаллади. Якунда у тўққизинчи поғонага кўтарилди, бироқ Алжамейн Стерлинг ва Шон O'Мэллидан мағлуб бўлгач у рейтингдан чиқиб кетди.

Хабиб спортни тарк этишидан олдин беш ой давомида P4P етакчилигини сақлаб қолди. Махачев UFC'даги ғалабалари сони бўйича аллақачон уни ортда қолдирган (14 га - 13) ва энди Исламнинг март ойидан олдин октагонга қайтишини ҳисобга оладиган бўлсак пешқадамлик муддати бўйича Хабибдан ўзиб кетиши мумкин.

Хорижий сайтлар асосида Сарвиноз Рахмоқулова тайёрлади