Махачев Топурияга қарши жангга тайёрлигини айтди

Бироқ бу жанг қайси вазнда бўлишига аниқлик киритмаган.

Аввалроқ, 34 ёшли россиялик енгил вазнга қайтиш учун ҳеч қандай сабаб кўрмаётганини айтган эди. 29 ёшли Топурия Махачев каби икки вазн тоифасида UFC чемпиони ҳисобланади. Яқинда Топурия рафиқаси Жоржина Узкатеги билан ажрашиш шартлари бўйича келишиб олганди. Унинг ёзда октагонга қайтиши кутилмоқда.

"Менга бу ғоя ёқади, - деди Махачев Сербиянинг Telegraf нашрига Топурияга қарши жанг ҳақида берган интервьюсида. - Агар UFC бу жангни хоҳласа, у амалга ошади. MMA мухлислари бу жангни хоҳлашларини биламан. Мен тайёрман.

Махачев навбатдаги жанги ҳақида гапирар экан, ҳозирда UFC’дан жанг санаси ва рақиб исми ҳақида маълумот кутаётганини маълум қилди.

"Менинг дивизионимда чемпионлик учун курашишга лойиқ бўлган кўплаб даъвогарлар бор. UFC тез орада навбатдаги рақибимни айтиши керак. Шу холос. Мен шунчаки кутяпман", - деди чемпион.

Шунингдек, Ислам Рамазон ойидан кейин навбатдаги жангга тайёргарликни бошлашини, ёзда октагонга қайтишга тайёрлигини ва шу йилнинг июнь ойида Оқ уйда бўлиб ўтадиган катта турнирда иштирок этишини истисно қилмаслигини айтди.

"Ҳа, бу мен навбатдаги жангимни ўтказадиган майдон бўлиши мумкин, - деди Махачев Оқ уйдаги жанг ҳақида. - Рамазон ойида машғулот ўтказмайман, кейин аста-секин тайёргарликни бошлайман. Оқ уйда ёки бошқа турнирда жанг ўтказишга тайёрман".