Майк Тайсон илк бор самолётдаги "ишкали" бўйича гапирди

Хабарингиз бор, воқеа шу йилнинг 20 апрель куни Тайсон Сан-Францискодан Флоридага учаётганда рўй берган эди. Парвоз олдидан Майк хоҳловчилар билан бирга суратга тушган, ҳеч кимга бу борада рад жавобини бермаганди. Фақат бир йўловчи боксчининг асабини бузишга уринган, Майк яхши гапиришига қарамай, қуюшқондан чиққан эди. Натижада Тайсон унинг юзига бир-икки мушт туширишга мажбур бўлганди.

"У шунчаки устимдан кулишда давом этди. Мен у билан бажонидил суратга тушишга ҳам рози бўлдим. Рафиқам ҳар сафар одатий йўловчи парвозларида учмаслигимни, йўловчилар билан бу каби нохуш ҳолатлар рўй беришини айтиб огоҳлантиради. Тан оламан, рафиқам бу борада ҳақ ва бундан кейин оддий рейсларда парвоз қилмаслигим керак", — дея Тайсоннинг сўзларини келтиради TMZ.