Медалcиз якунланган кундан сўнг Ўзбекистон паралимпиячиларининг умумжамоа ҳисобидаги ўрни ўзгардими?

Кечаги кун дастурида ўзбекистонлик паралимпиячилар медаль қўлга кирита олишмади. Бугунги кун олдидан Ўзбекистон спорт делегацияси 6 та олтин, 4 та кумуш, 4 та бронза медали билан умумжамоа ҳисобида 10-ўринни эгаллаб турибди. Кеча 9-поғонадан жой олгандик. 

Хитой Республикаси 53 та олтин, 40 та кумуш, 22 та бронза, жами 115 та медаль билан рўйхатда катта устунлик билан пешқадамлик қиляпти. Чин юрти вакиллари кечаги баҳсларда ҳам бир кун олдинги кунда бўлгани каби 10 та олтин медаль қўлга киритишди. Бу билан уларнинг умумий медаллари сони 100 тадан ошди. Ўттизта олтин, 18 та кумуш, 13 та бронза медалига эга Буюк Британия иккинчи ўринни эгаллаб турибди. АҚШ спортчилари 20 та олтин, 22 та кумуш, 11 та бронза медали билан кучли учликка якун ясашган. Бразилия делегацияси 14 та олтин, 11 та кумуш, 23 та бронза медали тўртинчи поғонадан жой олган.  

Биздан аввалги ўринларни Франция, Австралия, Италия, Украина ва Нидерландия терма жамоалари банд этган. Кеча 4 та олтин медаль қўлга киритган Украина 10-поғонадан 7-ўринга кўтарилиб олди. Украинанинг умумий медаллари сони 45 тага етди. Жами 53 давлат делегациялари ҳисобида камида 1 тадан олтин медаль бор. Камида 1 та бронза медалини қўлга киритган давлатлар сони 72 тага етди.