Мексикада WBC ташкилотининг йиллик 60-Конгресси иш бошлади, унда супероғир вазндаги боксчимиз ҳам қатнашяпти

Тинч океани қирғоғидаги ушбу сайёҳлик шаҳри 11 ноябрга қадар ташкилотнинг юбилей 60-конгрессига мезбонлик қилади. Унда Бутунжаҳон бокс иттифоқига аъзо икки юзга яқин давлатдан делегатлар иштирок этяпти. Улар орасида Ўзбекистон номидан қатнашаётган Тимур Ибрагимов ҳам бор. 

Ибрагимов ўз вақтида ҳаваскор бокс бўйича собиқ Иттифоқ чемпиони, беш карра Ўзбекистон чемпиони, Осиё чемпиони ҳамда Атланта-96 Олимпиадаси иштирокчиси бўлган. Ўн икки йил давом этган профессионал боксчилик фаолияти давомида 37 та жанг ўтказган бўлиб, 31 (16 нокаут) ғалаба, 4 мағлубият ва 1 дуранг қайд этган. 

Ибрагимовнинг бизга хабар беришича, WBC президенти Маурисио Сулейман бошчилигида ўтказилаётган конгресснинг биринчи куни бир қатор тадбирлар ўтказилиши баробарида муҳим масалалар ҳам муҳокама қилинган. Конгресснинг тантанали очилиш маросимида Маурисио Сулейман, Герреро штати губернатори Эвелин Сальгадо Пинеда сўзга чиқишган.