Мезбонлар сўнгги кун қўлга киритилган 3 та олтин эвазига якунда умумжамоа ҳисобида биринчи бўлишди

Уч кун давомида "Геолог" спорт мажмуасида ташкил этилган мамлакат биринчилигида Қорақалпоғистон Республикаси, барча вилоятлар ва Тошкент шаҳрида келган 2008-2009 йилларда таваллуд топган ёш дзюдочилар медаллар йўлида баҳс олиб боришди.

Якунда Қашқадарё вилояти терма жамоаси медаллар жамғариш бўйича умумжамоа ҳисобида биринчи ўринни эгаллашди. Мусобақа мезбонлари 5 та олтин, 2 та кумуш, 5 та бронза медалини қўлга киритишди. 

Сўнгги кунги беллашувларда 4 та вазндан 3 тасида чемпионлик шоҳсупасига кўтарилган қашқадарёликлар Хоразм вилояти дзюдочиларини қувиб ўтишди. Хоразм вилояти терма жамоаси 4 та олтин, 5 та кумуш, 9 та бронза медали билан иккинчи ўринни эгаллади. Кучли учликка Тошкент шаҳри дзюдочилари 2 та олтин, 4 та кумуш, 4 та бронза медали билан якун ясашди.   

Шунингдек, Бухоро, Самарқанд, Жиззах ва Тошкент вилояти терма жамоалари ҳам камида бир нафардан Ўзбекистон чемпионига эга бўлишди. Афсуски, бу сафар Фарғона, Наманган ва Навоий вилояти дзюдочилари мусобақани медалсиз якунлашди.