Миллий олимпия қўмитасида ўзбек таэквондо мутахассислари жам бўлди

Унда шунингдек, Миллий олимпия қўмитаси Бош котиби Жасур Матчанов, Жисмоний тарбия ва спорт вазирининг биринчи ўринбосари Ойбек Касимов, вазирлик бошқарма бошлиғи Назиржон Худойқулов, Ўзбекистон таэквондо WT ассоциацияси бош котиби Аббос Латипов ва юртимизда таэквондонинг турли йўналишларида фаолият кўрсатиб келаётган мутахассислар, ассоциациянинг вилоят бўлимлари мутасаддилари иштирок этишди. 

Йиғилишда спортнинг ушбу турини юртимизда янада ривожлантириш борасида таклифлар ўртага ташланди. Шунингдек, соҳада учраётган муаммолар, Олимпия ва Осиё ўйинларида медаллар сонини кўпайтириш, ютуқлар салмоғини ошириш масалалари муҳокама қилинди. 

Ассоциациянинг вилоят бўлимлари вакиллари томонидан бугунги кундаги энг асосий муаммолардан бири спорт анжомлари масаласи эканлиги қайд этилди. Ўз ўрнида, бу масала юзасидан иш бошлангани, МОҚ ва вазирлик томонидан бу муаммолар яқин орада бартараф этилиши айтиб ўтилди. 

Йиғилишда шунингдек, Ўзбекистон таэквондо WT ассоциацияси бош котиби Аббос Латипов бундан буён ҳамжиҳатликда, бир оила бўлиб ишлаш ҳақида гапириб ўтди.

"Биз турли йўналиш вакиллари бўлсакда, бир неча йиллардан бери бир-биримизни яхши таниймиз, бирга ишлаб келганмиз. Тўғри, ИТФ йўналиши бугунги кунда анча ривожланган, у ерда кучли спортчилар етишиб чиққан. Шунинг учун, биргаликда ишлаб, фаолият олиб борсак янада ривожланамиз, натижаларимиз яхшиланади. 

Янги ўтказиладиган мусобақага келадиган бўлсак, унинг қоидасини биргаликда ишлаб чиқишимиз лозим. Чунки қоидалар турлича. Аниқ қарорга келиб, кучли спортчиларни саралаб оламиз. Шунингдек, ИТФ йўналишида кучли мураббийлар ҳам етарли. Улар учун ВТФ йўналиши бўйича семинарлар ҳам ташкил қилиб берамиз", - деди Аббос Латипов.

Йиғилиш қатнашчилари учрашув давомида ўзларини қийнаётган муаммолар, турли тўсиқлар ҳақида маълум қилишди. Унда мураббийларнинг сертификациялаш масаласига ҳам тўхталиб ўтилди. Ўз ўрнида, раҳбарият бундай муаммолар бартараф этилиши, сертификациялаш масалалари соддалаштирилиши ҳақида маълум қилишди.