Мирзаҳаким Тўхтамирзаев: "Олимпиадада қарзларни тўлаяпмиз? Кимдан қарз олгандик?"

Журналист шарҳловчига "Токио Олимпиадасида Рио ва Осиё чемпионатларидаги қарзимизни тўлаяпмизми?" мазмунида савол берди: 

Мирзаҳаким Тўхтамирзаев эса ушбу саволга қуйидагича жавоб берди:

- Қанақа қарз? Кимдан қарз олгандик? Биласизми, эл оғзига элак тутиб бўлмайди. Агар шундай бўлса 2017 йилда Тошкентда ўтказилган Осиё чемпионатидан сўнг қўшниларимиз Қозоғистон терма жамоаси вакиллари ҳафа бўлишлари лозим эди. Аммо ўшанда улар ортиқча эътироз билдиришмаганди.

Майли, ўша йили Осиё чемпионатида ўз уйимизда бошқалардан кучли эканлигимизни исботладик. Лекин, Екатеринбургдаги жаҳон чемпионатида ҳам биринчи бўлдик. Агар бундай таъбир билан айтадиган бўлсак, ўша мусобақада россияликлар биринчи бўлишлари керак эди. Шунинг учун, қарзларни тўлаяпмиз деган фикрга қўшилмайман.

Спортда шундай нарса бор: яққол устунликка эга жамоага барча қарши бўлади.

Ўз вақтида Куба жаҳон боксида устун бўлганда Россия, АҚШ, Ўзбекистон, Қозоғистон, Германия ва бошқа мамлакат боксчилари учун шараф эди. Бугун барча ўзбек боксчисини мағлуб этишига интилмоқда. Улар бу орқали ўз обрўларини ошириб олишга уринмоқда. Бу томонлама рақибларда шижоат кучли бўлишини тан олишимиз лозим. 

Ҳакамлар ҳам инсон, улар ҳам қачондир, кимгадир хайрихоҳлик билдиради. Ёдингизда бўлса, Ҳасанбой Дўсматов Германиядаги жаҳон чемпионати финалига чиққан ва ўшанда якунда кубалик боксчига қарши жангдан сўнг кумуш медални қўлга киритганди. Ўшанда жангдан сўнг кубалик боксчининг қўли баланд кўтарилганида, рақиб секундантларининг оғзи очилиб қолганди. Ўшанда буни кўрганман. Ана шундай ҳакамларга инсоф берсин, бу спорт.

Тўлиқ интервьюни томоша қилинг: