МОҚ раиси ўринбосари Жаҳон чемпионатига кетиш олдидан дзюдочилар билан суҳбатлашди

Ўзбекистон Миллий олимпия қўмитаси раиси ўринбосари, мамлакат дзюдо федерацияси раиси Азизжон Камилов сафар олдидан дзюдочилар билан учрашди. 

"Ҳар бирингиз жаҳон чемпионатида муносиб иштирок этишга қодирсизлар. Фақат бунга ўзингизни ишонтира олишингиз керак. Халқимиз мусобақадаги иштирокингизни интизорлик билан кутяпти. Уларнинг кайфиятини янада кўтариш учун яхши натижага эришишингиз лозим. Имкон қадар кўпроқ ғалаба қозониб, қимматли рейтинг очколарини жамғариб олиш даркор. Сизлар ҳеч кимдан кам эмассизлар", - деди федерация раиси.  

 Ўз ўрнида дзюдочилар ҳам бор маҳоратларини максимал даражада ишга солиб, жаҳон чемпионатидан яхши натижалар билан қайтишга ваъда беришди.