МОҚ вице-президенти Азизжон Камиловни табриклаймиз!

Ўзбекистон дзюдо федерацияси раиси, Ўзбекистон Миллий олимпия қўмитаси вице-президенти, жонкуяр ва фидоий раҳбар Азизжон Камилов ўз таваллуд айёмини нишонламоқда. 

Тан олиш керак, Азизжон Якубжанович федерация раҳбарлигига тайинланганидан сўнг юртимиз дзюдосидаги ислоҳотлар янада жонланди. Дзюдочиларимиз томонидан халқаро мусобақаларда қўлга киритилаётган натижаларда ҳам ижобий томонга ўсиш кузатилди. 

Шу йилнинг ўзида бир йўла икки дзюдочимиз Дюссельдорф "Катта Дубулға" турнирида олтин медални қўлга киритди. Бундай натижа анча йиллардан бери кузатилмаётган эди. Ўтган йилги Тошкент Гран-приси илк бор пойтахтимиздаги кўп тармоқли, муҳташам "Ҳумо Арена"да юқори савияда ташкил этилди. 

Буни халқаро экспертлар ҳам эътироф этишди. Балки, шунинг натижаси ўлароқ юртимизга илк бор катталар ўртасидаги жаҳон чемпионати мезбонлиги ишониб топширилди. Бу каби муваффақиятларни узоқ санаш мумкин.       

Фурсатдан фойдаланиб, мураббийлар штаби, дзюдочилар, умуман, катта ўзбек дзюдо оиласи Азизжон Камиловни ҳар бир инсоннинг ҳаётидаги унутилмас ва ўзгача кун - таваллуд айём билан чин қалбдан муборакбод этади. Азизжон Якубжановичга сиҳат-саломатлик, оилавий бахт, хотиржамлик, фарзандлари роҳатини кўриб юришларини чин дилдан тилаймиз. 

Насиб қилса, биз биргаликда яна катта ютуқларга эришамиз. Олдимизда тўрт йилликнинг энг нуфузли мусобақаси, ундан аввал эса Жаҳон чемпионати ҳамда Тошкент Гран-Приси кутиб турибди. Азизжон Якубжанович бошчилигидаги юртимиз дзюдочилари ушбу мусобақаларда халқимиз кутаётган натижаларга эришиш учун астойдил ҳаракат қилади. 

Ғалаба ва омад ёр бўлсин! Яна бир бор таваллуд айёмингиз муборак бўлсин!