Муддатидан аввал якунланган даъвогарлар жангида Усикнинг рақиби аниқланди

Оқшомнинг муҳим жангларидан бири супероғир вазн тоифасида вақтинчалик WBA йўналиши чемпиони Фабио Уордли ҳамда худди шу мақомдаги WBO камари соҳиби Жозеф Паркер ўртасида ўтказилди. 

Паст суръатда ўтган ва асосан якка зарбалар алмашинувидан иборат бўлган жанг 11-раундда якунланди. Уордли канатлар олдида Паркерга зарбалар ёмғирини ёғдирди ва жавоб реакцияси бўлмагач, рефери жангни тўхтатишга мажбур бўлди. Лекин тан олиш керак, зарбаларнинг аксарияти аниқ чиқмади. 

Ушбу ғалаба Уордлини супероғир вазн тоифасида мутлақ жаҳон чемпиони Александр Усик учун мажбурий даъвогарга айлантирди. Аммо ҳар икки боксчи ҳам украиналик жаҳон чемпионига муносиб қаршилик кўрсата олмаслиги кечаги жангда билиниб қолди. Яна ким билади дейсиз? Супероғир вазнда битта дайди зарба ҳам масалани ҳал қилиб қўя олади.