Муҳриддин Тиловов: "Бронзани Тошкентда олтинга айлантирамиз"

-66 кг вазн тоифасида юртимиз шарафини ҳимоя қилган Сардор Нуриллаев ва Муҳриддин Тиловов номдор рақибларини енгиб, шоҳсупага кўтарилишди. Кечаги муваффақиятли иштирок бугунги ғалабаларга замин яратишига, дзюдочиларимизни илҳомлантириши, зафар сари одимлашига хизмат қилишидан умидвормиз. 

"Биринчи навбатда мусобақага юқори даражада тайёргарлик кўришимиз учун шароит яратиб берган Ўзбекистон Жисмоний тарбия ва спорт вазирлиги, Миллий олимпия қўмитаси, дзюдо федерацияси раҳбариятига раҳмат айтмоқчиман. Исроилдаги турнирга қадар Туркияда халқаро ўқув-машғулот йиғини ташкил этиб берилди. Бу йиғин бизнинг фойдамизга хизмат қилди. Шунингдек, алоҳида тарбия берган ота-онам, мураббийларимга ҳам ташаккур изҳор этаман. Бу уларнинг ғалабаси. Бизнинг муваффақиятли иштирокимиз қолган дзюдочиларимизни ғалаба сари руҳлантирсин. Умид қиламанки, Исроилда қўлга киритилган бронза медалини икки ҳафтадан сўнг Тошкентда ўтказиладиган "Катта Дубулға" турнирида олтинга айлантираман", - деди М.Тиловов. 

Маълумот учун, бу Муҳриддин Тиловов учун фаолиятидаги иккинчи "Катта Дубулға" турнири медали ҳисобланади. У 2017 йилда Боку "Катта Дубулға" турнирида кумуш медалга эга чиққан эди.