Мужибилло Турсунов қанча вазн ташлаганини маълум қилди

Терма жамоамизнинг жаҳон чемпионатидаги юришини -60 кг вазн тоифасида ўзини синаб кўрадиган Мужибилло Турсунов бошлаб беради. Чарм қўлқоп устамиз жанг олдидан қанча вазн ташлагани ҳақида гапирди.

"Терма жамоамизнинг иштирокини чиройли ғалаба билан бошлаб берамиз, Ин Ша Аллоҳ. Тўғри, биринчи бўлиш масъулият юклайди. Лекин ҳозирча босимни ҳис қилмаяпман. Чунки аренага ҳали бормадим. 

Янги вазн жисмоний имкониятларимга таъсир ўтказмайдими? Ҳозирча барчаси яхши. Ҳамма нарсанинг иложи бор. Аллоҳга таваккал қилдик. Яширмайман, бу сафар жуда кўп - 72 кгдан бошлаб вазн ташладим, яъни тахминан 12 кг. Аллоҳ ўзи ёрдам берди, шунисига шукур. Бизга рақибнинг кимлиги муҳим эмас. Ҳаммасига тайёрмиз", - деди Мужибилло Olamsport.com'га берган интервьюсида.

Эслатиб ўтамиз, Турсунов бугун ҳиндистонлик В.Сингҳ Вариндерга қарши рингга чиқади.