Надаль 19 ёшида ўйнаган ва чемпион бўлган турнирида орадан 19 йил ўтиб кортга чиқди

Испаниялик теннис афсонаси Швециянинг Бостад шаҳрида ўтказилаётган ATP турнирида муваффақиятли старт олди. ATP рейтингида 261-ўринни эгаллаб турган Надаль илк даврада мезбонлар вакили, дунёнинг 461-ракеткаси Лео Боргни мағлубиятга учратди - 6/3, 6/4.

Бу теннисчиларнинг ўзаро ўтказган илк учрашуви эди. Саксон беш дақиқа давом этган баҳсда Надаль 5, Борг 2 та эйс зарбасини амалга оширган. Брейклар бўйича устунлик 2 га 0 кўринишида Рафа фойдасига ҳал бўлди. 

Қизиғи, Надаль Бостаддаги турнирда сўнгги бор 2005 йилда, 19 ёшида иштирок этган ва ўшанда у бош совринни қўлга киритганди. Энди Рафаэль Nordea Open турнирининг иккинчи босқичида британиялик Кэмерон Норрига қарши кортга чиқади.

Маълумот учун, грунт қироли ҳисобланган Рафаэль Надаль сўнгги бор 27 май куни "Ролан Гаррос" турнирининг илк даврасида дунёнинг тўртинчи ракеткаси, германиялик Александр Зверевга имкониятни бой бериб қўйганди - 3/6, 6/7(5), 3/6.