Miami Open. Раҳимовадан ажойиб камбэк, Тимофеевада эса...

Мусобақанинг саралаш баҳсларида мамлакатимизнинг биринчи ҳамда иккинчи ракеткалари - Камилла Раҳимова ва Мария Тимофееванинг ҳам ўз омадини синаб кўриши ҳақида хабар берган эдик. Уларнинг ҳар иккиси ҳам саралашнинг илк давра учрашувини ўтказди. 

Раҳимова 1/2 финалда франциялик Леолия Жанжанга қарши кортга чиқди. Биринчи сетни тай-брекда бой берган вакиламиз камбэкни амалга оширишни уддалади - 6/7(1), 7/5, 6/0. Икки соату 50 дақиқа давом этган баҳсда Раҳимова 3, Жанжан 6 та эйс зарбасини амалга оширган. Қўшхатолар Камиллада биттага кўпроқ бўлди - 7 га 6.   

Афсуски, иккинчи ракеткамиз Мария Тимофеева саралашнинг мураккаб кечган 1/2 финал учрашувида австралиялик Лулу Сунга 4/6, 6/7(5) ҳисобида имкониятни бой бериб, мусобақадаги иштирокини якунлади. 

Таққослаш учун, Камилла Раҳимова WTA рейтингида 82, Жанжан 123, Тимофеева 150, Сун 111-ўринни банд этган. Ҳар икки теннисчимиз рақибалари билан илк бор тўқнаш келишди. Бугун Раҳимова асосий тўрга йўлланма берувчи финал баҳсида дунёнинг 68-ракеткаси, 21 ёшли Талиа Гибсонга қарши кортга чиқади. Учрашув бизнинг вақт билан соат 20:00да бошланади.