Наманган аҳолисининг қанчаси спорт билан мунтазам шуғулланмоқда?

Вилоят ҳокимлиги катта залида бўлиб ўтган йиғилишда вилоятда фаолият кўрсатаётган 40 та спорт федерация ва ассоциациялари, ташкилот ҳамда корхоналарнинг раҳбарлари иштирок этдилар.

Таькидлаш керакки, 2016 йилда вилоят спортчилари томонидан ҳалқаро ва юртимиз бўйлаб ўтказилган нуфузли мусобақаларда 294 та олтин, 370 та кумуш ва 431 та бронза медаллари қўлга киритилди.

Қувонарлиси, Бразилияда бўлиб ўтган ёзги олимпия ўйинларида Муроджон Аҳмадалиев бронза медалини қўлга киритди ва ҳудди шу давлатда ўтказилган Паралимпия ўйинларида Нозимахон Қаюмова найза улоқтириш бўйича рекорд ўрнатиб, олтин медалга эгалик қилди.

Йиғилишда федерация раҳбарларининг ҳисоботи тингланиб, айрим спорт турлари бўйича юзага келган масалалар ечимига урғу қаратилди.

Қизғин мулоҳазалар асосидаги йиғилишда вилоят ҳокимининг ўринбосари, хотин-қизлар қўмитаси раиси Хилола Юсупова соғлом жамиятни шакиллантиришда ёш авлодни спортга кенг жалб этиш, айниқса, аёллар спортига янада кўпроқ эътибор қаратиш лозимлигини айтиб ўтди. 

Маьлумот ўрнида айтиш керакки, бугунги кунда вилоятда 8509 та спорт объектларида 203 минг 235 нафар наманганликлар спортнинг 54 тури бўйича  амалий машғулот олиб боришмоқда.

Йиғилишда олдинда турган нуфузли беллашувларга тайёргарлик кўриш масаласи ҳам муҳокамалар марказида бўлди. Ўртага ташланган барча масалалар, таклиф ва фикрлар асосида тегишли қарор қабул қилинди.