Немков — Ромеро жанги номаълум муддатга қолдирилди

Ярим оғир вазн тоифасида Bellator чемпиони, россиялик Вадим Немков ҳамда кубалик Йоэль Ромеро ўртасида 4 февраль куни Bellator 290 турнири доирасида ўтказилиши кутилган жанг номаълум муддатга қолдирилди.

Аввалроқ, Немковнинг ўзи ҳам жангни бошқа санага кўчиришни раҳбариятдан сўрашини маълум қилган эди. У февраль ойигача тиклана олмаслигини қўшимча қилиб ўтганди.

Вадим Немков ўзининг сўнгги жангини шу йилнинг ноябрь ойида Bellator 288 мусобақаси доирасида америкалик Кори Андерсонга қарши ўтказди. Ушбу қарама-қаршиликда Вадим ҳакамларнинг якдил қарори билан ғалаба қозонди. Унинг ҳисобида айни дамда 15 ғалаба ва 2 мағлубият бор.

Ромеро сўнгги бор шу йилнинг сентябрь ойида Bellator 285 мусобақасида нидерландиялик Мелвин Манхоэфга қарши жанг ўтказган. Мазкур жанг Йоэлнинг фойдасига учинчи раундда нокаут билан якунланган эди. Ромеронинг ҳисобида 15 та ғалаба ва 6 та мағлубият мавжуд.