Нигора Турсунқулова: “Ваъда бериб қўйиш мени табиатимга ёт нарса”

Терма жамоага номзод қизларимиз Туркияда, йигитлар эса Янгиобод ўқув-машғулот базасида ўз йиғинларини ўтказишяпти. Биз терма жамоанинг тажрибали аъзоларидан бири Нигора Турсунқулова билан суҳбатлашдик. 

– Мана, ўқув-йиғин машғулотларимизда кўриб турганингиздек Токио олимпиадасига тайёргарлик олиб бориш учун янги мураббий жалб этилди. Ва ушбу мураббий билан машқларни бошлаб юбордик. Тайёргарликларнинг ҳаммаси яхши кетяпти. Олдинда Олимпиадага йўлланма берувчи тўртта “G-Seria” мусобақалари бор. Мазкур мусобақаларда яхши натижалар кўрсатиб, насиб қилса, олимпия ўйинлари учун лицензияларни қўлга киритамиз. Серия туркумларидан ўта олмаган спортчилар учун якуний мусобақа Хитойда ўтказилади ва бу Олимпиадада иштирок этиш учун йўлланма тақдим этувчи охирги турнир саналади. Мен ҳам 2016 йилда Рио олимпиадасига тақдим қилинадиган йўлланмани айнан шу мусобақада финалгача етиб борган ҳолда қўлга киритганман.

– Манчестердаги муваффақиятсизликларни терма жамоадаги тажрибали спортчи сифатида қандай баҳолайсиз?

– Биласизми, ҳамма мусобақага ғалаба қозониш учун ташриф буюради. Ана шу турнир учун қийинчиликлар, оғир машғулотларни бошдан кечиради. Аммо бу – спорт. Қанча тиришманг, ҳаракат қилманг барибир Худо тақдирингизга ёзгани бўлади.

Биз ҳозирда жуда малакали мураббий қўлостида машғулотларни олиб боряпмиз. Бу ерда ҳамма профессионал спортчи ҳисобланади. Уларда мураббий яхши таассурот қолдирмоқда. Демак, биз ёмон мураббий билан эмас, яхши ҳамда тажрибали мураббий билан машғулотларни ўтказмоқдамиз.

– Олимпиада ўйинларида ўзингизга қандай мақсад қўйгансиз?

– Тўғриси, олдиндан бирон нарсани ваъда бериб қўйиш мени табиатимга ёт нарса. Албатта, чемпион бўлишни, юртимиз довруғини жаҳонга танитишни истайман. Аммо ундан аввал Олимпиада йўлланмасини қўлга киритишни мақсад қилганман. Кейин эса Токиодаги мусобақалар ҳақида бирон нарса дейишим мумкин.