Нокаутларга бой Андижондаги проф бокс оқшомининг барча натижалари + ФОТОГАЛЕРЕЯ

Промоутер Сардорбек Раззоқов томонидан ўтказилган бокс оқшомига Андижон олимпия ва паралимпия спорт турларига тайёрлаш маркази аренаси мезбонлик қилди. Pro Boxing Night 4 оқшомидан жами 10 та жанг ўрин олган бўлиб, асосий жанг Улуғбек Собиров (13-3-0) ҳамда Қобилжон Бобожонов ўртасида ўтказилди. Ушбу жанг 10 раунд этиб белгиланган эди. Тажрибали Собиров рақибини биринчи раунддаёқ техник нокаутга учратди.  

Эътиборга молик жиҳати шундаки, 11 та жангдан 8 таси муддатидан аввал якунланган. Иккита жанг тўлиқ давом этган ва яна биттасида дуранг натижа кузатилган. 

Яримўрта вазн тоифаси вакили Давронбек Ҳайиталиев Паҳлавон Назиржоновни иккинчи раундда, яримўрта вазн вакили Умидилло Абдурасулов Самандарбек Абдуносировни иккинчи раундда, суперенгил вазн тоифасида жанг қилган Сардорбек Ғаниев Муҳаммадамин Козимовни учинчи раундда, яримоғир вазн вакили Шоядбек Холдаров Асадбек Турсуновни иккинчи раундда, суперўрта вазнда Жамшидбек Тожибоев Ҳусанбой Миркомиловни иккинчи раундда, суперенгил вазнли Нодирбек Сойибов Асрорбек Абдуманнобовни биринчи раундда, суперўрта вазнда рингга чиққан Абдулазиз Абдупаттаев эса Абдусаид Фозиловни биринчи раундда техник нокаутга учратган. 

"Асакабанк" ходими вакили, ҳаваскор боксчи Асилбек Ваҳобов ALP бокс клуби вакили Фурқат Шодилжоновдан устун келди. Яримўрта вазн тоифасида тўлиқ тўрт раунд давом этган Асилбек Маҳамаджонов ва Муҳаммадали Азимжонов жангида эса дуранг натижа кузатилди.