"Номзодлар турнири". Синдаров тарихий натижага яқинлашяпти

Хабар берганимиздек, 10-турда амалдаги Жаҳон Кубоги ғолиби Жавоҳир Синдаров ҳиндистонлик Рамешбабу Праггнанандҳани мағлуб этиб, очколарини 8 тага етказиб олганди. 

Ҳозиргина Жавоҳир 11-турда жаҳон рейтингида учинчи ўринни эгаллаб турган америкалик Фабиано Каруанага қарши ўйинини якунади. Қора доналарда ҳаракат қилганига қарамай, ҳамюртимиз дуранг натижа қайд эта олди. Бу билан Жавоҳир 8,5 очко тўплаган ҳолда чемпионлик учун муҳим қадамни ташлади. Бу икки шахматчининг биринчи даврадаги учрашувида Синдаров ғалаба қозонган эди. Каруана 5,5 очко билан учинчи ўринга кўтарилди.    

Мусобақа якунланишига уч тур қолмоқда. Дуранглар қироли номи билан танилган нидерландиялик Аниш Гири Синдаровнинг энг яқин таъқибчиси бўлиб, унинг россиялик Андрей Есипенкога қарши баҳси дуранг натижа билан якунланди. Бу билан икки очколик фарқ сақланиб қолди. Жавоҳир эртагаёқ Жаҳон тожи учун бериладиган ягона йўлланмани қўлга киритиши мумкин.

Маълумот учун, Синдаров Жаҳон тожи учун ўйнаш имкониятини берадиган турнирда иштирок этаётган биринчи ўзбек шахматчиси ҳисобланади. Ўн тўрт турдан иборат мазкур турнир ғолиби жаҳон тожи учун ҳиндистонлик Гукеш Доммаражуга қарши дона суради.