"Номзодлар турнири". Синдаровни тарихий натижадан ярим очко ажратиб турибди

Хабар берганимиздек, кеча ўтказилган 12-турда амалдаги Жаҳон Кубоги ғолиби Жавоҳир Синдаров дунёнинг иккинчи рақамли шахматчиси америкалик Ҳикару Накамура билан тезкор дурангга рози бўлди. Бу билан Жавоҳир мағлубиятсиз серияни давом эттириш баробарида очколарини 9 тага етказиб олди. Кечаги турнинг барча партияларида кучлар тенг келди. 

Мусобақа якунланишига икки тур қолмоқда. Жавоҳирга биргина шахматчи етиб олиши мумкин, холос. У ҳам бўлса дуранглар қироли номи билан танилган нидерландиялик Аниш Гири. Синдаровнинг энг яқин таъқибчиси кеча 12-турда хитойлик Вей Йига қарши кечган баҳсда устунликка эга бўлса-да, лекин якунда дуранг билан кифояланди. Бу эса Синдаров билан ўртадаги икки очколик фарқни сақланиб қолишига замин яратди. 

Бугун "Номзодлар турнири"да дам олиш куни сифатида эълон қилинган. Эртага 13-турда Жавоҳир муддатидан аввал мусобақа ғолиблиги билан бирга Жаҳон тожи учун кечадиган матчга йўлланмани қўлга киритиши мумкин. Бунинг учун у тўғридан-тўғри рақиби Аниш Гири билан дуранг ўйнаса кифоя. 

Маълумот учун, Синдаров Жаҳон тожи учун ўйнаш имкониятини берадиган турнирда иштирок этаётган биринчи ўзбек шахматчиси ҳисобланади. Ўн тўрт турдан иборат мазкур турнир ғолиби жаҳон тожи учун ҳиндистонлик Гукеш Доммаражуга қарши дона суради.