Новак Жокович: "Кучли жуфтликсиз "Дэвис Кубоги"ни ютиб бўлмайди"

"Биз кортга ғалабага ишонган ҳолда чиқдик. Агар оқ байроқни ташлашга тайёр бўлсак, нима учун майдонга чиқамиз? Биз ҳар доим бу ўйин қарама-қаршиликдаги энг қийини бўлишини билардик. Чунки, бизга дунёдаги энг яхши жуфтлик рақиблик қилаётганди. Улар ҳар доим бирга ўйнашади ва бир-бирларини жуда яхши тушунишади. Улар жуфтлик ўйинларида мутахассис теннисчилар. Бу уларнинг ўйини, улар шунга эътибор қаратишган.

Биз у қадар кўп тандемда ўйнамаганмиз. "Дэвис Кубоги"ни қўлга киритиш учун бизга жуфтлик ўйинлари бўйича кўпроқ мутахассис ва кучли жуфтлик керак. Акс ҳолда ғалаба қозониш қийин бўлади. Бу худди майдондаги лотереяга ўхшайди, чунки улар бир-бирларини жуда яхши тушуниб ҳаракат қилишади. Улар тўп қаерга ҳаракатланишини аниқ билишади.

Биз учун бундай эмас. Тўпни майдон ўртасига олиб чиқамиз, яккалик баҳсларида бу етарли. Аммо, жуфтликда улар бу ҳудудни қамраб олади ва осонгина очко ютади. Муваффақиятсиз бўлсангиз, муаммолар бошланади. Улар ўйин давомида бизга босим ўтказишди. Биз ҳаракат қилдик, лекин бу натижа бермади. Биз албатта, жуфтликлар ўйинида яхшиланишимиз керак. Терма жамоага доим бирга ўйнайдиган жуфтлик керак, акс ҳолда ҳар бир бундай ўйин Эверестни забт этишдек бўлаверади", - дея Жоковичнинг сўзларидан иқтибос келтиради Okko Sport.