Новак Жокович "Ролан Гаррос"даги юришини бошлади

Сербиялик теннисчи илк даврада ATP рейтингида 142-поғонада бораётган франциялик Пьер-Юг Эрберни қийинчилик билан мағлубиятга учратди - 6/4, 7/6(3), 6/4. Бу теннисчиларнинг ўзаро ўтказган иккинчи учрашуви эди. Ўтган йили Париж "Мастерс" турнирида ҳам Жоковичнинг қўли баланд келганди.

Икки соату 33 дақиқа давом этган баҳсда Жокович 4, Эрбер 7 та эйс зарбасини амалга оширган. Қўшхатолар мезбон теннисчида уч баробар кўпроқ бўлди 6 га 2. Брейклар бўйича устунлик Новак томонда - 3 га 1! Энди амалдаги чемпион иккинчи босқичда Роберто Карбальес-Баэнага қарши кортга чиқади. Испан теннисчи биринчи даврада француз Констан Лестьенндан устун келди - 6/3, 7/5, 4/6, 6/2.