Нурсултон октагонга чиқадиган UFC Боку турнирининг асосий жанги эълон қилинди + ПОСТЕР

Промоушен матбуот хизмати томонидан ушбу оқшомнинг асосий жанги расман эълон қилинди. Озарбайжонлик енгил вазн тоифаси вакили Рафаэль Физиев main-event жангида мексикалик Мануэль Торресга қарши октагонга кўтариладиган бўлди. 

Ўтган йилнинг июнь ойида Рафаэль Физиев Бокудаги UFC дебют турнирида Игнасио Бахамандес устидан ҳакамларнинг якдил қарори билан ғалаба қозониб, учта мағлубиятли сериясини якунлаганди. Шу йилнинг январь ойида "Атаман" яна мағлубиятга учради. Бу сафар у Сиднейдаги UFC 325 турнирида Маурисио Руффига техник нокаут билан ютқазди.

Мануэль Торрес эса, аксинча, 2024 йил сентябрь ойида ташкилотдаги илк мағлубиятини Бахамандездан техник нокаут эвазига қабул қилиб олган ва кейин Дрю Добер ва Грант Доусонни техник нокаутга учратган эди. У икки муддатидан олдин қозонилган ғалаба билан бу жангга келмоқда. 

Айни пайтда Рафаэль Физиев UFC енгил вазн тоифаси рейтингида ўн биринчи ўринни эгаллаб турибди. Мануэль Торрес эса сўнгги янгиланишда дивизионнинг энг яхши Топ-15 жангчилари рўйхатидан чиқарилди.