"Очиқ эшиклар куни" 600 нафардан зиёд ёш дзюдочиларни бирлаштирди ФОТОРЕПОРТАЖ

Эътиборлиси, "Очиқ эшиклар куни" номи остида ўтказилган ушбу беллашувларда Сурхондарё, Бухоро, Самарқанд, Жиззах, Фарғона ва Тошкент вилоятлари, Тошкент шаҳри, Чирчиқ ҳамда пойтахтимиздаги олимпия захиралари мактаб интернати жамоаларининг ёш дзюдочилари татамида ўз истеъдодларини намойиш этишди.

Хабарингиз бор, 2025 йил мамлакатимиз ёшлар ўртасидаги Осиё ўйинларига мезбонлик қилади. Бугунги тадбир учун айнан бўлажак қитъа ўйинларида қатнашиши мумкин бўлган ёш тоифаси ҳам танлаб олинган эди. Мақсад - шу каби турнирлар, фестиваллар орқали ёш дзюдочиларни пишитиб бориш, катта мусобақаларга тайёрлаш.

Мактаб ўқувчилари ўртасида ўтказилган мусобақа ёшларда жуда катта қизиқиш уйғотди. Буни иштирокчиларнинг сони ҳамда географияси ҳам тасдиқлайди. Бир вақтнинг ўзида 600 нафардан зиёд ёшлар татамида беллашишди.

Шунингдек, бу кичик турнирни ўтказишдан кўзланган мақсад - ёшлар ўртасида дзюдони оммалаштириш, соғлом турмуш тарзини спорт орқали қарор топтириш, шу йўналишдаги Президент фармонларининг ижросини таъминлашдан иборат. Тошкент шаҳрида тест шаклида ўтказилган мусобақа энди вилоятларда ҳам ташкил этилади. 

Мусобақа сўнггида ғолиб ва совриндорларга ташкилотчиларнинг қимматбаҳо совғалари топширилди.