Octagon 68. Чемпион Анвар Абдуллаевнинг тажрибали рақибга қарши жанги тўлиқ давом этди

Турнирнинг марказий жанги ўта енгил вазн тоифасида Лига чемпиони бўлиб турган ўзбекистонлик аралаш якка кураш устаси Анвар Абдуллаев (9-0) ҳамда Interim (вақтинчалик чемпионлик камари) соҳиби, Озарбайжон вакили Фарид Алибабазаде (13-8-1) ўртасида кечди.

5 раундлик чемпионлик жанги тўлиқ давом этди ва унда Абдуллаев ҳакамларнинг якдил қарори билан ғалабани ўзиники қилди.

Бу Сурхондарёда туғилган Абдуллаев учун иккинчи ҳимоя жанги эди. У 2023 йилнинг декабрь ойида ўтказилган Octagon 53 турнири доирасида бошқа бир озарбайжонлик спортчи — Рояль Лейлизадени мағлуб этиб, илк бор камарини ҳимоя қилганди. Таъкидлаш жоиз, Анвар ҳар икки ҳимоя жангини озарбайжонлик спортчиларга қарши ўтказиб, ғалабага эришди.

Ёдингизда бўлса, 30 ёшли Фарид Алибабазаде 2023 йилда MPL 10 турнири доирасида кейинчалик UFC'га ўтган ўзбекистонлик Рамазон Темиров билан юзма-юз келганди, улар кейинчалик камар учун жанг қилиши айтилганди, бироқ бу ҳозирча амалга ошмади.