02 дек 12:19
Янгиликлар
Оғир атлетика
Оғир атлетика. 18 ёшли Эргашев АҚШдаги жаҳон чемпионатида 4-ўринни эгаллади
АҚШнинг Калифорния штати, Анахайм шаҳрида оғир атлетика бўйича катталар ўртасидаги жаҳон чемпионати давом этмоқда.
Дунёнинг юздан зиёд давлатидан энг сара атлетлар иштирок этаётган йилнинг энг нуфузли мусобасида Ўзбекистон терма жамоаси полвонлари ҳам ўз маҳоратларини намойиш этишяпти. Анахаймда 10 нафар спортчимиз (8 нафари эркаклар, 2 нафари аёллар) супачага чиқишмоқда.
Атлетларимизнинг иштирокини -62 кг вазн тоифасидаги ҳамюртимиз Адҳам Эргашев бошлаб берди. Ёшлар ўртасида жаҳон ва Осиё чемпиони бўлган 18 ёшли Эргашев катталар ўртасидаги жаҳон чемпионатида ҳам мураббийлар ишончини оқлади.
Кучлилар жам бўлган А гуруҳида иштирок этган Адҳамжон рақиблари орасида энг ёш спортчи эди. Шунга қарамай 61,85 кг вазнга эга ҳамюртимиз даст кўтаришда 135, силтаб кўтаришда 157, умумий 292 кг натижа билан кучли тўртликдан жой олди.
Бронза медалини қўлга киритган грузиялик 23 ёшли Шота Мшвилидзе умумий 298 кг натижага эришди. Икки курашда роппа-роса 300 кг натижа кўрсатган колумбиялик Антонио Валенсия Москуэра жаҳон чемпионига айланди.
Ҳавола :
Манба : olamsport.com
Фикрлар