Оғир атлетика. Муҳаммадқодир Тоштемиров - ёшлар ўртасидаги жаҳон чемпионати ғолиби, Ҳожиакбардан 2та бронза

Бир оз олдин -81 кг вазн тоифасидаги атлетлар чиқишларини якунлашди.  

Ушбу вазнда бир йўла икки нафар атлетимиз медаллар учун кураш олиб боришди. 

Даст кўтариш машқида, кумуш ва бронза медаллари учун кураш ўта муросасиз кечди. 2003 йил таваллуд топган иқтидорли спортчимиз Ҳожиакбар Олимовга (150 кг) бронза учун 1 кг, кумуш учун эса атиги 2 кг етмади.  

Кутилганидек, Муҳаммадқодир Тоштемиров (161) ишончли тарзда барча рақибларини ортда қолдириб олтин медални қўлга киритди. Биринчи ўринни нақд қилгач, спортчимиз жаҳон рекордини янгилашга уриниб кўрди, аммо Тоштемиров штангани ушлаб қола олмади.  

Қайд этиш лозим, Муҳаммадқодир энг яқин таъқибчисини 9 кгга ортда қолдирди.  

Шу куни ҳар икки машқда ҳам Муҳаммадқодирга бас келадиган рақиб топилмади. Атлетимиз ишончли тарзда, катта фарқ билан (иккикураш натижасига кўра 16 кг) рақибларини ортда қолдирди ва даст кўтариш, силтаб кўтариш ҳамда иккикурашда ҳам олтин медалларга эга чиқди. 

Яна бир ёш спортчимиз, Ҳожиакбар Олимов ҳам ишончни оқлади ҳамда силтаб кўтариш ва иккикураш натижасига кўра бронза медалларини қўлга киритди. 

Шу тариқа, -81 кг вазнли атлетларимиз терма жамоамиз ҳисобига 3та олтин ва 2та бронза медалини қўшиб қўйишди.

Оғир атлетика бўйича ёшлар ўртасида Жаҳон чемпионати
Эркаклар, -81 кг

1. Муҳаммадқодир Тоштемиров (Ўзбекистон) - 343 (161 + 182) кг;

2. Карен Маргарян (Арманистон) - 327 (152 + 175) кг;

3. Ҳожиакбар Олимов (Ўзбекистон) - 326 (150 + 176) кг.