Оғир атлетика. Ўсмирларимиз Жаҳон чемпионатида қатнашиш учун АҚШга етиб боришди

8-15 март кунлари АҚШнинг Лас-Вегас шаҳрида оғир атлетика бўйича ўсмирлар ўртасида навбатдаги жаҳон чемпионати баҳслари бўлиб ўтади. Эътиборлиси, унда Ўзбекистон ўсмирлар терма жамоаси ҳам иштирок этади. Бу ҳақда Миллий Олимпия қўмитаси матбуот хизмати хабар қилди.

Хабарда қайд этилишича, Ўзбекистон оғир атлетика федерацияси раисининг биринчи ўринбосари Шаҳрулло Маҳмудов бошчилигидаги мамлакатимиз спорт делегациясининг бир қисми, аниқроғи қизлар терма жамоаси кеча океан ортига етиб борди ҳамда энди машғулотлар АҚШда давом эттирилади.

Жамоа таркибидан ўтган йили Аргентинада бўлиб ўтган III ўсмирлар ёзги Олимпиадаси ғолиби, Ўзбекистон спорти тарихида қизлар ўртасидаги биринчи жаҳон чемпионига айланган Кумушхон Файзуллаева каби истеъдодли спортчилар ўрин олган.

Жамоамиз таркиби:

-55 кг: Оғабек Нафасов;

-67 кг: Ҳожиакбар Олимов, Асадбек Наримонов;

-73 кг: Оғабек Тўхтаев;

-96 кг: Мирҳосил Мирзабоев;

-45 кг: Нигора Абдуллаева;

-59 кг: Нигора Сувонова;

-64 кг: Кумушхон Файзуллаева;

-76 кг: Турсуной Жабборова.

Жаҳон чемпионатида сайёрамизнинг юзга яқин давлатидан ёш атлетлар иштирок этиши кутилмоқда. Қизларимиз Лас-Вегасда тайёргарликнинг сўнгги босқичини олиб бораётган бўлса, ўсмирларимиз АҚШга 7 март куни етиб боради.

Шу ўринда таъкидлаш жоиз, сўнгги йилларда оғир атлетикачиларимиз бирорта нуфузли халқаро мусобақадан медалсиз қайтишмаяпти. Умид қиламизки, бу гал ҳам анъана давом этади. Терма жамоамиз аъзоларининг дастлабки чиқиши 9 мартга белгиланган. Жаҳон чемпионати баҳслари эса 15 мартга қадар давом этади.